சுந்தரம் சாவு வீட்டில் பறையடிப்பவன். ராக்கம்மா ஒப்பாரி பாடுகிறவள். சாவு வீடுகளில் தொழில் நிமித்தமாகச் சந்தித்துக் கொள்ளும் இவர்களுக்குள் மலர்கிறது காதல். மற்றவர்களுக்குத் துயரத்தை கொடுக்கும் இறுதி சடங்குகள் இவர்களுக்கு மங்கல நிகழ்ச்சியாகிறது. காதல் கனிந்து வரும் நேரத்தில், அந்த காதலுக்கு ஊர் பெரிய வீட்டு பெண்ணின் ஈகோ ஒன்று வில்லனாக வருகிறது. இறுதியில் காதல் எப்படி வெல்கிறது என்பது மீதிக் கதை.கதையும், காதலும் பழசுதான் என்றாலும் சொல்லியிருக்கும் விதமும், சொல்லப்பட்டிருக்கும் களமும் புதிதாக இருக்கிறது.
குழந்தை நட்சத்திரமாக நடித்து வந்த மாஸ்டர் மகேந்திரன் இதில் கதையின் நாயகனாக புரமோஷனாகியிருக்கிறார். பறையடித்து பிழைக்கும் எளிய மனிதனை அப்படியே பிரதிபலிக்கிறார். அழுக்கு லுங்கி, சட்டை, அரிதாரம் பூசாத முகம் இவற்றின் மூலமே காதலை சுலபமாக கொண்டு வருகிறார். காதலித்தவளை யுகேந்திரனுக்கு பேசி முடித்த பிறகு அதைத் தட்டிக் கேட்கவும் முடியாமல் தடுக்கவும் முடியாமல் தவித்து தன் பறையொலி மூலமே அதை வெளிப்படுத்துவது அற்புதமான நடிப்பு.
ராக்கம்மாவாக நடித்திருக்கும் மாளவிகா நம்பிக்கையான வரவு. அவருக்கு பெரிதாக வேலை இல்லை. புருவம் சுருக்கி, கண்களை இறுக்கி அவர் காதலை வெளிப்படுத்துவது அழகு. பேச்சில் குரூரத்தையும், வார்த்தையில் வஞ்சத்தையும் வைத்திருக்கும் பிள்ளையார்பட்டி ஜெயலட்சுமி கிராமத்து சொர்ணாக்காவாக பின்னியெடுக்கிறார். பொசுக்கென்ற அவர் மரணம் கூட தியேட்டரில் சிரிப்பை கொண்டு வருகிறதென்றால் அவர் நடிப்பு அப்படி. வில்லன்போல வந்து கடைசியில் ஒரு மனிதனாக நடந்து கொள்கிற யுகேந்திரன் கேரக்டர் யதார்த்தம்
.சீரியசான விஷங்களையும்கூட காமெடியாகச் சொல்லியிருப்பது பிரச்னையின் தீவிரத்தை குறைக்கிறது. தன்னை உயர்ஜாதியாக கருதிக் கொள்கிற வில்லி, தன் மகன் தாழ்ந்த ஜாதி பெண்ணை காதலிப்பதை இவ்வளவு மென்மையாகவா கையாள்வார்? சுந்தரம் மீது வில்லி அத்தனை கோபம் கொள்வதற்கு போதிய காரணம் இல்லை.
அதேபோல சுந்தரம் மீது ராக்கம்மா காதல் கொள்ள வைக்கிற அளவிற்கான அழுத்தமான காட்சிகள் இல்லை.ஜேம்ஸ் வசந்தனின் இசையில் மண்ணின் மணம். யு.கே.செந்தில்குமாரின் ஒளிப்பதிவு கதைக்கு நேர்மையாக அமைந்திருக்கிறது.
புத்தாண்டு தினத்தை வெளிநாடுகளில் கொண்டாட ஹீரோயின்களிடையே போட்டி ஏற்பட்டுள்ளது. புத்தாண்டு தினத்தை ஆடம்பர நட்சத்திர ஓட்டல்கள், பிரபலமான சுற்றுலா தலங்களுக்கு சென்றுதான் இதுவரை ஹீரோயின்கள் கொண்டாடி வந்தனர்.
.jpg)
இந்த தடவை அவர்களுக்கு அது அலுத்து போய் விட்டது போலும். 2014 புத்தாண்டை கொண்டாட பல நடிகைகள் வெளிநாடு செல்ல திட்டமிட்டுள்ளனர். இந்த ஆசையில் ஷூட்டிங்கை வெளிநாடுகளில் வைத்து கொள்ளலாம் என தயாரிப்பாளர்களுக்கு அன்பு கட்டளை பிறப்பித்திருக்கின்றனர்..jpg)
சிலருக்கு அந்த யோகம் கிடைத்துள்ளது. நடிகை பிரியா ஆனந்த், தாய்லாந்தில் புத்தாண்டு தினத்தை கொண்டாடுகிறார். அங்கு நடக்கும் தமிழ் படத்தின் படப்பிடிப்பிலும் பங்கேற்கிறார். பொதுவாக நான் பார்ட்டிகளில் பங்கேற்பதில்லை. ஆனாலும், இந்த புத்தாண்டை எனது குடும்பத்தினருடன் தாய்லாந்தில் கொண்டாட முடிவு செய்துள்ளேன்’ என்றார் அவர்.
புத்தாண்டு தினத்தில் தெலுங்கு மற்றும் இந்தி படங்களின் ஷூட்டிங்கு களில் பங்கேற்று குத்து பாடலுக்கு நடனம் ஆடுகிறேன். பிரபல பண்ணை வீடுகளில் இதுபடமாகிறது. பின்னர், எனது தோழிகளுடன் பிடித்தமான இடங்களுக்கு செல்கிறேன். புத்தாண்டில் எனது உடல் எடையை அதிகளவில் குறைக்க உறுதி எடுத்திருக்கிறேன் என்கிறார் சார்மி..jpg)
ஆடம்பர கப்பலில் குழந்தையின் பிறந்த தினத்தை கொண்டாட குடும்பத்துடன் ஆஸ்திரேலியா சென்றார் அஜீத். ஆரம்பம் படத்தையடுத்து அஜீத் நடிக்கும் படம் வீரம். சிறுத்தை சிவா டைரக்டு செய்கிறார்.
இப்படத்தின் ஷூட்டிங் முடிந்த கையோடு திருப்பதி வெங்கடாஜலபதி கோயிலுக்கு சென்ற அஜீத் படம் வெற்றி அடைய வேண்டி மொட்டை போட்டுக்கொண்டார். பொங்கலையொட்டி படம் திரைக்கு வரவுள்ளது. சமீபத்தில் வீரம் படத்தை பார்த்த அஜீத் இயக்குனர் மற்றும் தயாரிப்பாளரை அழைத்து பாராட்டியதுடன் நன்றி தெரிவித்துக்கொண்டார்.
வீட்டில் கிறிஸ்துமஸ் தினத்தை மகிழ்ச்சியுடன் கொண்டாடினார். இதையடுத்து குடும்பத்தினருடன் ஆஸ்திரேலியா பறந்தார். மனைவி ஷாலினி, மகள் அனோஷ்கா, மைத்துனர் நடிகர் ரிச்சர்ட் ஆகியோர் அஜீத் உடன் சென்றனர்.
சிட்னியில் இருந்து வெலிங்டன் செல்லும் ஆடம்பர கப்பலான குருஸ்ல் அஜீத் தங்குகிறார். அங்கு அனோஷ்காவின் பிறந்த தினத்தை கொண்டாடுவதுடன், புத்தாண்டையும் கொண்டாட உள்ளார்.
வீரம் படம் திரைக்கு வருவதற்குமுன் வரும் 9ம் தேதி அவர் சென்னை திரும்புகிறார்.
டிராக்டர் கம்பெனியில் வேலை செய்யும் நண்பர்கள் கார்த்தி, பிரேம்ஜி. ஆரணியில் அதன் கிளை திறப்பு விழாவுக்கு செல்லும் இருவரும் விழா முடிந்ததும், குடித்துக் கொண்டே திரும்புகிறார்கள். வழியில் பிரியாணி சாப்பிட ஆசைப்பட்டு ஒரு கடையில் நிறுத்துகிறார்கள் காரை. அதே கடைக்கு விலை உயர்ந்த காரில் வரும் மாண்டி தாக்கர், அவர்களை தனக்கு கம்பெனி கொடுக்க கேட்கிறாள். ஜொள்ளு பார்ட்டிகளான இருவரும் அவள் பின்னால் சென்று ஆடிப்பாடி குடித்து தீர்க்கிறார்கள். விடிந்து பார்த்தால், கூத்தடித்த அறையில் துப்பாக்கி, ரத்தக் கறை. போதையில் என்ன நடந்தது என்று இவர்களுக்குத் தெரியவில்லை. போலீஸ் வரவும் ஓடுகிறார்கள்.
அவர்களின் கார் டிக்கியில் தொழில் அதிபர் நாசரின் பிணம். பிரியாணிக்கு ஆசைப்பட்டு கொலை பழியில் சிக்கும் இவர்கள், எப்படி அதிலிருந்து மீள்கிறார்கள். இந்த சதிவலைகளின் பின்னணியில் யார் இருக்கிறார்கள் என்பதை ஆக்ஷன் திரில்லர் ஸ்டைலில் சொல்லியிருக்கிறார்கள்.பெண்களை கண்டவுடன் கரெக்ட் பண்ணும் கேரக்டரை ஹீரோ இமேஜ் பாதிக்காமல் நாசுக்காகச் செய்கிறார் கார்த்தி. பெண்கள் விஷயத்தில் பிரேம்ஜியை உசுப்பேற்றியே ரணகளமாக்குற கார்த்தியின் அலப்பறைகளும், பிரேம்ஜியின் புலம்பல்களும் ‘ஏ’ கிளாஸ் காமெடி.
கார்த்தியின் அந்த சிரிப்பும், தலைசாய்த்த நடையுமான டிரேட் மார்க் மேனரிசம் அவ்வப்போது எட்டிப்பார்த்து விடுகிறது.படம் முழுக்க நிறைந்திருக்கிறார் பிரேம்ஜி. படத்தின் பலமும் அதுதான், பலவீனமும் அதுதான். குளோஸ்&அப்பில் பேசி பேசி வெறுப்பேற்றுகிறார். கார்த்திக்குக்கு பிரச்னை வரும்போது களத்தில் குதிக்கையில் கொஞ்சம் நடிக்கவும் செய்திருக்கிறார். ஹன்சிகா வழக்கம்போல அழகு பொம்மை. பிற்பகுதியில் கதை ஆக்ஷனுக்குள் சென்று விடுவதால் அவ்வப்போது சில காட்சிகளில் வந்து போகிறார்.ஒரு காதல். அதனால் இரண்டு பெரிய சக்திகளுக்கு இடையேயான மோதல்.
அதற்குள் அப்பாவிகளான கார்த்தியையும், பிரேம்ஜியையும் மாட்ட வைத்தல், பூனையாக இருந்தவர்கள் புலியாக மாறி எதிரிகளை பந்தாடுதல் என்ற பரபர திரைக்கதையில் யூகிக்க முடியாத கிளைமாக்சால் படத்தை தாங்கிப் பிடித்திருக்கிறார் இயக்குனர். நாசர் மாதிரி மாஸ்க் போட்டு பிரேம்ஜி நடிப்பதெல்லாம் ஓல்டு ஐடியாவாக இருந்தாலும் நாசரின் நடிப்பால் சுவாரஸ்யமாகிறது. அந்த கடைசி நேர ட்விட்ஸ் கணிக்க முடியாதது. ஆனால், ‘அட இதுக்காகவா இவ்ளோ சுத்தி வளைச்சு கதை சொன்னாங்க என்று கேட்கத் தோன்றுகிறது.
போலீசை குடைந்தெடுக்கும் அந்த சிசிடி கேமரா காட்சி, சும்மா போதையில் பண்ணிய அலப்பறை என்று அவிழ்ப்பது ஏமாற்றம். அதைப் பதிவு செய்த கேமரா, கொலையாளியை பதிவு செய்யாமல் போனது ஏன்? திடீரென்று வரும் உமா ரியாஸ்கான் கேரக்டர், ஒட்டவே இல்லை. பிரச்னைகளுக்கு காரணமான மாண்டி தாக்கர், பாலியல் தொழிலாளியா? நாசரின் ஆசை நாயகியா? என்பதில் குழப்பம். யுவனின் 100&வது படம் என்கிறார்கள். அதற்கான எந்த மெனக்கெடலும் தெரியவில்லை. சக்தி சரவணனின் ஒளிப்பதிவு, பிரியாணிக்கு கலர் கொடுத்திருக்கிறது.
வாசன்ஸ் விஷூவல் வென்சர்ஸ் சார்பில் கே.எஸ்.சீனிவாசன் தயாரிக்கும் படம், நிமிர்ந்து நில். ஜெயம் ரவி இரண்டு வேடங்களில் நடிக்கிறார்.
மற்றும் சரத்குமார், அமலா பால், ராகிணி திவிவேதி உட்பட பலர் நடிக்கின்றனர். சமுத்திரக்கனி இயக்குகிறார்.
இந்தப் படம் தெலுங்கில் ஜண்டா பாய் கபிராஜு என்ற பெயரில் நானி நடிப்பில் உருவாகிறது. இந்தப் படம் பெர்லினில் நடக்கும் சர்வதேசத் திரைப்பட விழாவில் திரையிடப்படுகிறது.
பிப்ரவரி 7-ம் தேதி நடக்கும் இத்திரையிடலுக்காக, படக்குழுவினர் பெர்லின் செல்ல இருக்கின்றனர்.
போலீஸ் வேடத்தில் நடிக்கும் நயன்தாரா அதற்கான பயிற்சி பெறுகிறார். அஜீத்துடன் பில்லா படத்தில் நடித்த நயன்தாரா அப்படத்தில் ஆக்ஷன் காட்சிகளில் நடித்தார். அப்படத்துக்கு பிறகு சாஃப்டான வேடங்களில் நடித்து வந்தார். இந்நிலையில் தமிழில் ஜெயம் ரவியுடன் புதிய படத்தில் நடிக்கிறார்.
ராஜா டைரக்டு செய்கிறார். இதில் போலீஸ் அதிகாரியாக வேடம் ஏற்கிறார். இதற்காக உடலை ஸ்லிம் தோற்றத்துக்கு மாற்றுவதுடன் சண்டை காட்சிகளில் நடிப்பதற்காக பயிற்சி பெறுகிறார். இதற்கான போலீஸ் டிரெயினிங்கை சிறப்பு பயிற்சியாளர் மூலம் பெறுகிறார்.
நயன்தாரா வேடம் பற்றி இயக்குனர் ராஜாவிடம் கேட்டபோது, என்னுடைய படங்களில் ஹீரோயின்களுக்கு எப்போதுமே வலுவான வேடமாக இருக்கும். இப்படத்திலும் அதுபோல் ஒரு வலுவான கதாபாத்திரத்தில்தான் நயன்தாரா நடிக்க உள்ளார். ஏற்கும் கதாபாத்திரத்துக்கு அவர் எப்போதும் பொருத்தமான நடிப்பை வெளியிடுவார். அதை இந்த படத்திலும எதிர்பார்க்கலாம்‘ என்றார். போலீஸ் அதிகாரியாக நடிக்கிறாரா என்றதற்கு வேடம் பற்றி இப்போதைக்கு சொல்ல முடியாது என்று மறுத்துவிட்டார் ராஜா. இந்த படத்துக்காக ஐதராபாத் ராமோஜிராவ் பிலிம் சிட்டியில் ரயில் செட் போடப்பட்டுள்ளது. இந்த ரயிலில் படமாக்க வேண்டிய காட்சிகளை ராஜா இயக்கி வருகிறார்.
.jpg)
ஜீ வா, வினய், சந்தானம் மூவரும் பிரண்ட்ஸ். விளம்பர கம்பெனி நடத்துகிறார்கள். இவர்கள் வாழ்க்கையில் காதலும் இல்லை, கல்யாணமும் இல்லை. காரணம் ஜீவாவின் அம்மா, அப்பாவை விட்டு விட்டு ஓடிப்போக, பெண் இனத்தின் மீதே வெறுப்பு ஜீவாவுக்கு. அதனால் காதல், கல்யாணம் மீது வெறுப்பு. வினய்யும், சந்தானமும், நண்பன் லட்சியத்தை தாங்களும் ஏற்றுக் கொண்டிருக்கிறார்கள்.
திடீரென்று நண்பர்கள் இருவரும் திருமணம் செய்து கொள்ள, தனிமரமாக நிற்கிறார் ஜீவா. இந்த நிலையில் அவர் கம்பெனிக்கு இன்னொரு கம்பெனியின் பிரதிநிதியாக வருகிறார் த்ரிஷா. படப்பிடிப்புக்காக சுவிட்சர்லாந்து செல்கிறார்கள். பனிமலை குளிரில் ஜீவாவின் லட்சியமும் கரைந்து காதலாகிறது. சென்னை திரும்பும் வழியில் விமான நிலையத்தில் பழைய நண்பன் ஒருவனை சந்திக்க, அவன் ஜீவாவின் பிரம்மசாரியத்தை மெச்ச உடன் வந்த த்ரிஷாவை, சும்மா பிளைட்டில் அறிமுகமானவர் என்று சொல்ல, சுவிஸில் பூத்த காதல் சென்னை ஏர்போர்ட்டில் டமால் ஆகிறது.
அடுத்து என்ன நடக்கிறது என்பது மீதி கதை.கதையை காமெடியும், கவிதையுமாகச் சொல்லியிருப்பதன் மூலம் வித்தியாசப்படுத்தியிருக்கிறார் இயக்குனர். நண்பர்கள் திடீர் திருமணம் செய்து கொள்வதற்கான காரணமும், த்ரிஷா&ஜீவா காதல் முறியும் தருணமும் எதிர்பாராத ட்விஸ்ட்டுகள். ஜீவாவின் லட்சியத்தை சோதிக்கும் சூப்பர் மாடல் ஆண்ட்ரியாவின் கேரக்டரும், அவரது காது கடியும், இவரது கன்னத்தில் அடியும் சீரியசான கிக் மேட்டர்கள்.
சுவிஸ்சில் ஜீவாவை பழிவாங்க நினைக்கும் ஆண்டரியாவிடம், நீ இன்னும் கிளம்பலையா? என்று கேட்டு அதிர வைக்கும் ஜீவாவின் கேரக்டர் ரொம்பவே ஸ்ட்ராங்.காதலை வெறுப்பதும், அம்மாவின் துரோகத்தை நினைத்து வெதும்புவதும். அப்பாவை தள்ளி வைத்திருப்பதுமான கனமான கேரக்டரை ஈசியாக சுமக்கிறார் ஜீவா. காதலை பற்றி பேசும்போது அவர் முகத்தில் கோபம் வெடிப்பதும், தக்க சமயத்தில் உதவும் த்ரிஷா மீது நன்றி பார்வை வீசி, அதையே காதல் பார்வையாக மாற்றுவதுமாக ஸ்கோர் பண்ணுகிறார்.அறிமுக நடிகைபோலவே பிரஷ்சாக இருக்கிறார் த்ரிஷா. தலைமுடி பறக்க அவர் நடந்து வரும் அழகே தனிதான்.சந்தானத்தின் காமெடிதான் படத்துக்கு பலம்.
போனில் மனைவியிடம் சாப்பிட என்ன வச்சிருக்க? என்று சந்தானம் கேட்க, பதிலுக்கு மனைவி, ‘ஒரு கிளாஸ் விஷம் வச்சிருக்கேன்’ என்று கோபப்பட, அப்ப நீ சாப்பிட்டுட்டு படுத்துக்கோ. நான் வரலேட்டாகும் என்று இவர் சொல்ல, அள்ளு கிறது தியேட்டர்.
நண்பன் வினய், மகனின் அன்புக்கு ஏங்கும் தந்தை நாசர் இருவருமே சரியான நடிப்பை தந்திருக்கிறார்கள்.எப்போதும் குடி குடி என்று நண்பர்கள் கழிப்பது ஒரு கட்டத்தில் வெறுப்படைய வைக்கிறது. அப்பாவுடன் ஜீவா பேசாமல் இருப்பதற்கான காரணத்தில் அழுத்தம் இல்லை.மதியின் ஒளிப்பதிவு, சுவிட்சர்லாந்தின் அழகை அள்ளி வந்திருக்கிறது. ஹாரிஸ் ஜெயராஜின் பாடல்களில் அவரது முந்தைய படப் பாடல்களின் வாசனை. - தினகரன் விமர்சனக்குழு.
நடிகை சமீரா ரெட்டி தனது 2 வருட காதலரை மணக்க உள்ளார். அஜீத்துடன் அசல், சூர்யாவுடன் வாரணம் ஆயிரம், வேட்டை, வெடி, நடுநிசி நாய்கள் உள்ளிட்ட படங்களில் நடித்திருப்பவர் சமீரா ரெட்டி. மோட்டார் பைக் நிறுவன அதிபர் அக்ஷய் வர்தேவுடன் கடந்த 2 வருடங்களுக்கு முன் சமீராவுக்கு நட்பு ஏற்பட்டது. இருவரும் பல்வேறு இடங்களில் ஜோடியாக சுற்றித்திரிந்தனர். அப்போது இருவருக்கும் காதல் மலர்ந்தது.
இருவரும் மோட்டார் சைக்களில் பல சமயங்களில் ஜோடிபோட்டு சுற்றி னர். அப்போது தன்னை யாரும் அடையாளம் கண்டுகொள்ள முடியாதபடி சமீரா ஹெல்மெட் அணிந்து காதலனுடன் சவாரி செய்தார். கடந்த 2 வருடமாக இவர்களது காதல் வளர்ந்தது.
படங்களில் பிஸியாக நடித்து வந்த சமீரா ரெட்டி தனது காதலை ஒருபோதும் வெளிப்படுத்தாமல் ரகசியம் காத்து வந்தார். தற்போது அவரது காதல் அம்பலத்துக்கு வந்துள்ளது. கடந்த வாரம் சமீரா அக்ஷய் திருமண நிச்சயதார்த்தம் பாந்தராவில் உள்ள சமீராவின் வீட்டில் ரகசியமாக நடந்தது. இதில் நெருங்கிய நண்பர்கள் மட்டும் கலந்துகொண்டனர். இருவரும் மோதிரம் மாற்றிக்கொண்டனர்.
நிச்சயதார்த்தத்தில் கலந்துகொண்ட ஒருவர் கூறும்போது, சமீராவும், அக்ஷயும் ஒரே தெருவில் வசித்து வந்தனர். இது சமீராவுக்கு நீண்ட நாட்களாக தெரியாமல் இருந்தது. இருவரும் காதலர்களான பிறகே இந்த விவரம் தெரியவந்தது என்றார். அக்ஷயுடன் நிச்சயதார்த்தம் நடந்ததா? என்று சமீராவிடம் கேட்டபோது, ஆமாம் எங்களது நிச்சயதார்த்தம் நடந்துவிட்டது. அடுத்த ஆண்டு ஏப்ரல் மாதம் திருமணம் நடக்க உள்ளது என்றார்.
காய்ச்சலால் கடும் அவதிப்படுகிறார் ஸ்ருதி ஹாசன். பனிக்காலம் தொடங்கியநிலையில் ஊரெல்லாம் மர்ம காய்ச்சல் பலரை வாட்டி எடுக்கிறது. ஸ்ருதி ஹாசனுக்கும் காய்ச¢சல் ஏற்பட்டிருப்பதையடுத்து அவர் ஷூட்டிங் போக முடியாமல் அவதிப்படுகிறார்.
இதுபற்றி ஸ்ருதி டுவிட்டர் பக்கத்தில் கூறும்போது,‘சரியான தொல்லை. குளிர் ஜுரம் என்னை வாட்டி எடுக்கிறது. போர்வையை இழுத்துபோர்த்திக்கொண்டு வீட்டில் முடங்கிக்கிடக்கிறேன். மாத்திரை சாப்பிட்டும் ஜுரம் விட்டபாடில்லை.
மர்ம காய்ச்சலாக இருக்குமோ என்ற பயம் உள்ளது. என்னதான் மாத்திரை சாப்பிட்டாலும் இயற்கை வைத்தியம்தான் தீர்வை தரும் என்று எண்ணுகிறேன். அதையும் முயற்சித்து வருகிறேன்Õ என்றார். ஸ்ருதி தற்போது எவடு என்ற தெலுங்கு படத்தில் ராம் சரண் தேஜா ஜோடியாகவும், ரேஸ் குர்ரம் என்ற படத்தில் அல்லு அர்ஜுன் ஜோடியாகவும் நடித்து வருகிறார். தமிழில் அவர் புதிய படம் எதையும் தற்போது ஒப்புக்கொள்ளவில்லை.
சீனியர் நடிகைகளை ஒதுக்கும் ஹீரோக்கள் தங்களுக்கு ஜோடியாக இளம் மாடல் அழகிகளை ஒப்பந்தம் செய்கின்றனர். சில மாதங்களுக்கு முன் டோலிவுட்டில் ஒரு படத்தில் நடிக்க காஜலிடம் கால்ஷீட் கேட்கப்பட்டது. அவர் நடிக்க மறுத்துவிட்டார்.
மூத்த நடிகர்களுடன் ஜோடி சேர விரும்பவில்லை என்றும் தெரிவித்தார். இது சீனியர் நடிகர்களுக்கு கோபத்தை ஏற்படுத்தியது. இதையடுத்து ரகசியமாக சந்தித்த மூத்த நடிகர்கள் காஜல் போன்ற சீனியர் ஹீரோயின்களை தங்கள் படங்களில் ஜோடியாக்குவதற்கு பதிலாக புதுமுகங்களுக்கு வாய்ப்பு தருவது என்று முடிவு செய்தனர். இதையடுத்து மகேஷ்பாபு நடிக்கும் புதிய படத்தின் ஸ்கிரிப்ட் புதுமுகத்துக்கு ஏற்ப மாற்றப்பட்டது.
மும்பை மாடல் அழகி கிரிதி சனான் ஹீரோயினாக ஒப்பந்தம் செய்யப்பட்டார். இவர் ஒரு சில விளம்பர படங்களில் நடித்திருப்பதுடன் அழகிபோட்டிகளில் பங்கேற்று பூனை நடை நடந்திருக்கிறார். அதேபோல் இந்தியில் உருவான பேண்ட் பாஜா பாரத் படம் தமிழ் தெலுங்கில் ஆஹா கல்யாணம் என்ற பெயரில் உருவாகிறது. இந்தியில் ரன்வீர் சிங், அனுஷ்கா சர்மா நடித்திருந்தனர்.
ரீமேக்கில் நடிக்க நான் ஈ பட ஹீரோ நானி ஒப்பந்தம் செய்யப்பட்டார். அனுஷ்கா சர்மா போல் பிரபலமான நடிகைக்கு பதிலாக வாணி கபூர் என்ற மாடல் அழகி தமிழ், தெலுங்கு இருமொழியிலும் ஹீரோயினாக ஒப்பந்தம் செய்யப்பட்டார். இதேபோல் நாக சைதன்யா நடிக்கும் புதிய தெலுங்கு படத்தில் நடிக்க பூஜா ஹெக்டே ஒப்பந்தம் செய்யப்பட்டிருக்கிறார். இவர் 2010ம் ஆண்டு மிஸ் இந்திய போட்டியில் 2வது இடம் பிடித்தவர். ஏற்கனவே தமிழில் முகமூடி படத்தில் இவர் நடித்திருக்கிறார். டோலிவுட் நடிகர்களின் இந்த திடீர் நடவடிக்கையால் டாப் ஹீரோயின்கள் அதிர்ச்சி அடைந்துள்ளனர். காஜல் இந்தியில் கவனம் செலுத்துகிறார்.
த்ரிஷா, அனுஷ்கா, பிரியாமணி போன்றவர்கள் ஹீரோயினுக்கு முக்கியத்துவம் உள்ள படங்களில் நடிக்கின்றனர் என்பது குறிப்பிடத்தக்கது. வளர்ந்து வரும் நடிகைகளில் சமந்தா, சமீபத்தில் மகேஷ்பாபு படம் பற்றி பகிரங்கமாக எதிர்கருத்து கூறியதால் அவருக்கு வரவிருந்த பட வாய்ப்புகளும் பாதிக்கப்பட்டுள்ளது.
.jpg)
ஜாதி, மத மற்றும் ஆணாதிக்க சிந்தனை கொண்ட கடந்த தலைமுறை தாத்தாவை, பேரன் சுத்தப்படுத்தும் கதை. தாத்தாவுக்கு பேரன் மனிதத்தை போதிக்க, பேரனுக்கு தாத்தா மொழியையும், பண்பாட்டையும், கிராமத்தையும் போதிக்க, இப்படியான கொடுக்கல் வாங்கலை அடுத்த தலைமுறைக்கு தந்திருக்கும் படம். வைராக்கியமிக்க முதியவராக பாலுமகேந்திரா வாழ்ந்திருக்கிறார். வார்த்தைகளை வெட்டி வெட்டி பேசும் அவரது இயல்பான பேச்சு, அந்த கதாபாத்திரத்துக்கு யதார்த்தமாகப் பொருந்துகிறது. பேரனை முதன் முதலில் காணும் அந்த தருணத்தில் அவனுக்குள் தன்னைத் தேடும் அந்த பார்வை, அவனுக்கு தமிழ் தெரியவில்லை என்பதை அறிந்து தலையில் அடித்துக் கொள்ளும் சோகம், தூங்கும் பேரன் கையில் இருக்கும் மிட்டாயை எடுத்து தின்னும் குழந்தைதனம் என படம் முழுக்க கைபிடித்து அழைத்துச் செல்கிறார்.
அழகும், வெகுளித்தனமுமாக கவர்கிறான் மாஸ்டர் கார்த்திக். முதன் முதலில் ஆற்றை பார்க்கும் ஆவல், கிராமத்தின் ஒவ்வொரு பக்கத்தையும் ஆச்சர்யத்தோடு எதிர்நோக்கும் பார்வை, நீயும் செத்துடுவியா தாத்தா என்று கலங்கும்போது நம்மையும் கலங்க வைத்துவிடுகிறான். வடநாட்டு கிறிஸ்தவ மருமகள் கேரக்டரில் ரம்யா சங்கர் கச்சிதமான நடிப்பை தந்திருக்கிறார். பாலுமகேந்திராவின் மகளாக வரும் வினோதினி கிராமத்து தங்கச்சிகளை கண்முன் கொண்டு வந்து நிறுத்துகிறார். காட்சிக்குள் வராத அந்த இரண்டாவது மனைவி கேரக்டரும் காட்சிக்குள் வரும் மகள் கேரக்டரும் யதார்த்தமான பதிவு.
தந்தையை மீறவும் முடியாமல், தவிர்க்கவும் முடியாமல் தவிக்கிற தவிப்பை அழகாக வெளிப்படுத்தி இருக்கிறார் சஷிகுமார். பாலுமகேந்திராவின் ஒளி ஓவியத்துக்கு தனது ஒலியால் வண்ணம் சேர்த்திருக்கிறார் இளையராஜா. காக்கைகளின் சத்தமும், குயில்களில் பாட்டுமே அதிக காட்சிகளில் பின்னணியாக ஒலித்திருப்பதும், பல காட்சிகளில் இசை மவுனமாகி இருப்பதும் படத்தை கவிதையாக்கி இருக்கிறது. பேரன் பெயருக்கு பின்னால் ஜாதி பெயரை சேர்த்த பாலுமகேந்திராவிடம், நீ இந்து குடும்பத்துல பிறந்ததால இந்துவா இருக்கே. நான் கிறிஸ்தவ குடும்பத்தில பிறந்ததால கிறிஸ்தவனா இருக்கேன். இந்த அழுக்கு நம்மோட போகட்டுமே. அதை ஏன் அடுத்த தலைமுறைக்கு கொடுக்குற? என்று அந்த பாதிரியார் கேட்பது இந்த தலைமுறைக்கான பெரும் கேள்வி.
மருமகள் 8 கிலோ மீட்டர் நடந்து சர்ச்சுக்கு போகிறாள் என்பதற்காக ஏசு படத்தை பூஜை அறையில் மாட்டி இங்கேயே கும்பிட்டுக்கம்மா என்று சொல்வது, அ எழுத கற்றுக் கொள்ளும் பேரன் அதை உச்சா போயி எழுதிப்பார்ப்பதும், அதையே தானும் செய்து பார்ப்பது மாதிரியான பாலுமகேந்திரா டச் நிறைய இருக்கிறது. திருப்பமோ, பரபரப்போ இல்லாத கதை என்றாலும் காட்சிகளாலும் வசனங்களாலும் சுவாரஸ்யப்படுத்தியிருக்கிறார் பாலுமகேந்திரா. ஆனால் தாத்தாவும் பேரனும் ஆறு, குளம், தோட்டம் என சுத்துவது குழுந்தைகளுடன் விளையாடுவது என்று அடிக்கடி வரும் காட்சிகள் கொஞ்சம் அலுப்புத் தட்டத்தான் செய்கிறது. ஆனாலும் இப்படியொரு படத்தை உருவாக்கிய பாலுமகேந்திராவும் அதை தயாரித்த சசிகுமாரும் பாரட்டப்பட வேண்டியவர்கள்.
திரைப்பட தயாரிப்பாளர் கருமாரி கந்தசாமி நேற்று காலமானார். அவருக்கு வயது 73. ராமராஜன், கனகா நடித்து மெகா ஹிட்டான கரகாட்டக்காரன் படத்தை தயாரித்தவர் கருமாரி கந்தசாமி.
மேலும் வில்லுப்பாட்டுக்காரன், மனைவி ஒரு மந்திரி, எல்லாம் அவன் செயல் உட்பட 30 படங்களை தயாரித்துள்ளார். கோயில் யானை, மண்சோறு, வளர்த்த கடா உட்பட 13 படங்களை இயக்கி உள்ளார். நூற்றுக்கும் மேற்பட்ட படங்களை வினியோகம் செய்துள்ளார். சென்னை சாலிகிராமத்தில் வசித்து வந்த அவருக்கு கடந்த வாரம் உடல் நலக்குறைவு ஏற்பட்டது.
வடபழனியில் உள்ள தனியார் மருத்துவமனையில் சிகிச்சைப் பெற்று வந்தார். இந்நிலையில் நேற்று காலை மாரடைப்பால் மரணமடைந்தார். அவரது உடலுக்கு நடிகர்கள் ராமராஜன், மோகன், தயாரிப்பாளர் ஆர்.பி.சவுத்ரி, டி.பி.கஜேந்திரன் உட்பட ஏராளமான திரையுலகினர் அஞ்சலி செலுத்தினர். பின்னர் அவரது உடல் சொந்த ஊரான திருச்சி மலைக்கோட்டைக்கு நேற்றுமாலை கொண்டு செல்லப்பட்டது.
இறுதி சடங்கு இன்று நடக்கிறது. மறைந்த கருமாரி கந்தசாமிக்கு தேன் தமிழ்ச்செல்வன், குமரன், அண்ணாத்துரை ஆகிய மகன்களும் முருகு செல்வி என்ற மகளும் உள்ளனர். கருமாரி கந்தசாமியின் மனைவி விஜயா ஏற்கனவே காலமாகிவிட்டார்.
Subscribe to:
Posts (Atom)
.jpg)
.jpg)
.jpg)
.jpg)
Recent Comments